Ministri i Mbrojtjes i Norvegjisë, Tore Sandvik, deklaroi se Rusia po pëson humbje të mëdha njerëzore në luftën në Ukrainë, duke shtuar se shumë prej bazave ushtarake ruse pranë kufirit norvegjez janë tashmë pothuajse të zbrazëta.
Në një intervistë për median franceze Le Figaro, Sandvik u shpreh se nuk sheh rrezik të menjëhershëm për një konflikt të ri në rajonin e Arktikut, megjithëse situata mbetet e ndjeshme për shkak të rëndësisë strategjike të veriut rus.
“Rusia po humbet mijëra ushtarë në Ukrainë çdo ditë dhe bazat e saj ushtarake pranë kufijve tanë janë pothuajse të zbrazëta”, deklaroi ministri norvegjez.
Megjithatë, ai paralajmëroi se një konflikt i nisur në një tjetër zonë mund të zgjerohet drejt veriut, veçanërisht nëse presidenti rus Vladimir Putin do ta konsideronte të nevojshme mbrojtjen e interesave strategjike ruse në Gadishulli Kola.
Sipas Sandvik, ky rajon përmban një nga përqendrimet më të mëdha të arsenalit bërthamor rus dhe mbetet një pikë kyçe për sigurinë globale. Ai theksoi se pavarësisht kostove të luftës dhe vështirësive ekonomike, Moska vazhdon të mbajë aktive në zonë nëndetëset strategjike dhe sistemet e avancuara të armëve.
Ministri vuri në dukje edhe rolin e rëndësishëm të Norvegjisë në monitorimin e aktivitetit ushtarak rus. Sipas tij, përmes rrjeteve të radarëve dhe satelitëve, Norvegjia kontribuon në mbikëqyrjen e lëvizjeve të flotës ruse në Deti Barents, duke siguruar informacion të vlefshëm për aleatët e NATO-s.
“Kur nëndetëset me raketa balistike largohen nga bazat e tyre, ato kalojnë nëpër ujëra ku ne kemi mundësi t’i monitorojmë vazhdimisht. Kjo është jetike për aleatët tanë”, tha ai.
Sandvik theksoi se raketat strategjike të vendosura në rajon nuk synojnë Norvegjinë, por qytete të mëdha të Perëndimit, duke përmendur Toronto, Çikago, Nju Jork dhe Londër si objektiva potencialë në rast të një përshkallëzimi bërthamor.
Lidhur me mundësinë e vendosjes së forcave ajrore strategjike të NATO-s në territorin norvegjez, ministri u shpreh se kjo mbetet një çështje që kërkon diskutim të kujdesshëm, duke pasur parasysh kufirin e përbashkët me Rusinë dhe politikën tradicionale të Oslos për të kufizuar tensionet në rajonin e Arktikut.
Në fund, ai riafirmoi mbështetjen e fortë të Norvegjisë për Ukrainën, duke deklaruar se vendi i tij do të shpenzojë mbi 7 miliardë euro gjatë këtij viti për ndihmë ushtarake ndaj Kievit, ndërsa një pjesë e pajisjeve do të blihet nga Franca.
