Ka nisur mëngjesin e sotëm procesi i votimit për zgjedhjen e kryetarit të Partia Demokratike, ku në fletën e votimit figuron vetëm emri i Sali Berisha.
Procesi ka nisur në orën 08:00 dhe pritet të përfundojë në orën 18:00, ndërsa votimi zhvillohet në 87 qendra votimi në të gjithë vendin.
Zgjedhjet po zhvillohen në një klimë debatesh dhe kritikash, pasi pesë kandidatë të tjerë potencialë u skualifikuan nga gara me argumentin se nuk plotësonin kriteret statutore. Mes tyre ishte edhe ish-deputeti Ervin Salianji.
Deri tani, drejtuesit e selisë blu nuk kanë bërë publik numrin zyrtar të anëtarëve me të drejtë vote, çka ka ngritur pikëpyetje mbi pjesëmarrjen reale në proces.
Sali Berisha, i cili drejton Partinë Demokratike prej dekadash dhe ishte lideri i parë i saj pas themelimit në vitin 1991, kërkon një mandat tjetër në krye të partisë. Ai hyn në këtë proces pa zhvilluar fushatë të zakonshme elektorale dhe pa prezantuar një program të ri politik.
Kritikët brenda dhe jashtë partisë e kanë cilësuar procesin si një referendum formal dhe jo një garë reale për drejtimin e opozitës.
Ndërkohë, disa prej kandidatëve të skualifikuar i janë drejtuar Gjykatës së Tiranës për të kundërshtuar vlefshmërinë e procesit zgjedhor, ndërsa Evi Kokalari ka depozituar edhe kallëzim në SPAK ndaj Berishës dhe funksionarëve të tjerë të PD-së, duke i akuzuar për kontroll të paligjshëm të strukturave të partisë.
Pas zgjedhjeve të sotme, Partia Demokratike pritet të mbledhë Kuvendin Kombëtar javën e ardhshme, ku do të diskutohen edhe ndryshime në statut.
