Kryetari i Partia Demokratike, Sali Berisha, u bëri thirrje anëtarëve të partisë të marrin pjesë në votimin për votëbesimin e tij si kryetar, në një proces që zhvillohet sot pa kandidat alternativ.
Në një konferencë për mediat nga selia blu, Berisha e cilësoi procesin si një standard të avancuar të demokracisë së brendshme dhe mbrojti mungesën e rivalëve në garë.
Sipas tij, modeli “një anëtar, një votë” mbetet forma më moderne dhe më demokratike e përzgjedhjes politike brenda partive.
“Procesi i zgjedhjes me një anëtar një votë apo i votëbesimit me një anëtar një votë, është forma më epërore e cila për hir të së vërtetës, në 70-75% të rasteve që përdoret, është me një kandidat”, deklaroi Sali Berisha.
Ai shtoi se gara ka qenë e hapur, por sipas tij figura të tjera politike kanë shmangur kandidimin për shkak të pasigurisë mbi rezultatin.
“Jo se ajo nuk është e hapur, ajo është plotësisht e hapur, por sepse të tjerë, personalitete të tjera, ngurojnë një garë ‘një votë një anëtar’ për arsye të pasigurisë që ka ajo në rezultatin e fitores dhe nuk duan të përballen të regjistrojnë një jo-fitore”, u shpreh Berisha.
Deklaratat e tij vijnë në një moment kur brenda Partia Demokratike janë ngritur debate lidhur me mungesën e rivalëve në garë dhe trajtimin e figurave kritike apo kundërshtare brenda partisë gjatë viteve të fundit.
Megjithatë, kreu demokrat shmangu komentet mbi këto kritika dhe kërkoi pjesëmarrje të gjerë të anëtarësisë në votimin për rikonfirmimin e tij në krye të PD-së.
