Organizata Botërore e Shëndetësisë ka bërë thirrje për vigjilencë të shtuar pas konfirmimit të rastit të 12-të me hantavirus, i lidhur me shpërthimin në anijen turistike MV Hondius.
Drejtori i Përgjithshëm i OBSH-së, Tedros Adhanom Ghebreyesus, deklaroi në një konferencë për shtyp në Gjenevë se vendet duhet të vazhdojnë monitorimin e pasagjerëve që ndodheshin në bord dhe të zbatojnë masat e karantinës.
Sipas OBSH-së, rasti më i fundit është konfirmuar tek një anëtar holandez i ekuipazhit, i cili ndodhet në izolim. Numri total i të infektuarve ka arritur në 12, ndërsa deri tani janë regjistruar tre viktima.
Tedros bëri të ditur se nuk është raportuar asnjë vdekje e re që nga 2 maji, kur shpërthimi u njoftua për herë të parë.
Autoritetet holandeze konfirmuan se personi i infektuar është dërguar në spital si masë paraprake. Instituti Kombëtar Holandez për Shëndetin Publik dhe Mjedisin deklaroi se pacienti ishte izoluar në banesë dhe se testet pozitive janë verifikuar nga dy laboratorë të ndryshëm.
Sipas autoriteteve, rreziku për përhapje të mëtejshme në Holandë mbetet shumë i ulët.
Anija turistike MV Hondius ishte nisur më 1 prill nga Ushuaia, përpara se të vijonte itinerarin drejt Kepi Verde dhe Tenerife.
