Ambasadori i OSBE në Shqipëri, Michel Tarran, deklaroi nga Pogradeci se reforma zgjedhore dhe reforma territoriale po vijojnë me mbështetjen e ndërkombëtarëve, ndonëse sipas tij procesi fillimisht ka ecur ngadalë.
Diplomati theksoi se komisioni i posaçëm për reformën zgjedhore ka humbur kohë në fillim të punës, por shtoi se tashmë diskutimet kanë rifilluar dhe po trajtohen çështje të rëndësishme si financimi i partive politike.
“Që nga fillimi kanë punuar ngadalë, kanë humbur kohë, por gëzohemi që kanë rifilluar punën e tyre”, deklaroi Tarran.
Ai sqaroi se OSBE nuk ka rol për të imponuar modele konkrete zgjedhore apo territoriale, duke theksuar se çdo shtet zgjedh vetë sistemin që i përshtatet më mirë.
Sa i përket debatit për uljen e numrit të deputetëve në Kuvend, ambasadori u shpreh se kjo është një çështje që duhet të vendoset vetëm nga shqiptarët.
“150, 200, 50 apo 300 deputetë është problem i juaj”, tha ai, duke shtuar se vende të ndryshme kanë sisteme dhe modele të ndryshme parlamentare.
Në lidhje me reformën territoriale, Tarran u tregua i rezervuar për mundësinë e miratimit të një harte të re administrative përpara zgjedhjeve të ardhshme, duke thënë se deri tani nuk ka sinjale të qarta se procesi do të përfundojë në kohë.
Ambasadori komentoi edhe ankesat e partive të vogla për dominimin e reformës zgjedhore nga partitë e mëdha, duke kujtuar se shumë demokraci funksionojnë mbi modele dypartiake ose me koalicione të mëdha politike.
Ai solli si shembull edhe sistemin politik në Shtetet e Bashkuara të Amerikës, ku sipas tij dominimi i dy partive nuk e bën vendin më pak demokratik.
“Ekzistojnë sisteme të ndryshme dhe Shqipëria duhet të gjejë modelin që është më i përshtatshëm për vendin”, deklaroi Tarran.
Në fund, diplomati francez kujtoi se proceset e tranzicionit politik dhe ndryshimet zgjedhore janë të zakonshme edhe në vende me demokraci të konsoliduara, duke përmendur debatet e vazhdueshme për sistemin zgjedhor edhe në Franca.
