Mereme Sela është zyrtarisht jashtë garës për drejtimin e Partia Demokratike e Shqipërisë, pasi edhe Gjykata e Tiranës ka refuzuar padinë e saj kundër vendimit të Komisionit të Operacioneve Elektorale në PD.
Sipas vendimit të datës 8 maj, të marrë nga gjyqtarja Suela Xhani, kërkesë-padia e Selës paraqiste mangësi të shumta procedurale dhe formale. Gjykata konstatoi se paditësja nuk kishte përcaktuar qartë të dhënat identifikuese, nuk kishte bashkëlidhur dokument identifikimi të vlefshëm dhe nuk kishte saktësuar siç duhet subjektin e paditur.
Po ashtu, në vendim theksohet se nuk ishte paguar tarifa gjyqësore dhe se provat e dorëzuara ishin fotokopje të panjësuara me origjinalin, çka bie ndesh me kërkesat ligjore për paraqitjen e dokumentacionit në gjykatë.
Në këtë mënyrë, pas skualifikimit nga Komisioni i Operacioneve Elektorale në PD më 1 maj, rruga ligjore e Selës për rikthim në garë mbetet e bllokuar, të paktën për momentin.
Pas këtij zhvillimi, Sali Berisha mbetet kandidati i vetëm në zgjedhjet për kreun e PD-së që do të zhvillohen më 23 maj.
Në garë kishin tentuar të futeshin edhe Ervin Salianji, Evi Kokalari, Alesia Balliu dhe Vladimir Mulaj, por kandidaturat e tyre nuk u pranuan.
Vetë Sela reagoi publikisht duke deklaruar se nuk ishte njoftuar ende zyrtarisht nga gjykata dhe se do ta ndjekë çështjen deri në fund.
“Do t’i shkoj gjërave deri në fund. Të bardhës i them e bardhë, e të zezës e zezë”, është shprehur ajo.
