Qyteti i Durrës është zhytur në zi dhe trishtim, një ditë pas aksidentit tragjik që i mori jetën dy fëmijëve të mitur në zonën e ish-Kënetës.
Familjarët, të afërmit dhe banorët e zonës i kanë dhënë sot lamtumirën e fundit dy vogëlushëve, në një ceremoni mortore të mbushur me dhimbje dhe lot. Atmosfera ka qenë e rëndë, ndërsa heshtja dhe pikëllimi kanë mbizotëruar në të gjithë lagjen.
Ngjarja e rëndë ka tronditur jo vetëm komunitetin lokal, por mbarë opinionin publik, duke rikthyer edhe një herë në vëmendje çështjen e sigurisë në rrugë dhe mbrojtjes së jetës së fëmijëve.
Ndërkohë, një tjetër fëmijë që mbeti i plagosur nga aksidenti vijon të jetë nën kujdesin e mjekëve në spital.
Tragjedia ka lënë pas dhimbje të thellë te familjet dhe të afërmit, ndërsa qytetarët kërkojnë masa më të forta për të parandaluar ngjarje të tilla në të ardhmen.
