Zgjerimi i Autostrada Tiranë-Durrës po vijon me ritme intensive, ndërsa autoritetet kanë zbuluar detaje të reja mbi fazat e ardhshme të projektit.
Drejtori i Autoriteti Rrugor Shqiptar, Ami Kozeli, bëri të ditur se aktualisht shpejtësia e lejuar është 100 km/h për shkak të punimeve, por me përfundimin e plotë të projektit ajo do të arrijë deri në 140 km/h.
Sipas tij, zgjerimi po e çon këtë aks në kategorinë A, ndërsa po instalohen edhe kamera monitorimi në mbikalimet e këmbësorëve për të rritur sigurinë rrugore.
Punimet aktuale janë përqendruar te ndërtimi i mbikalimeve në zonat e Laknasit dhe Rinasit. Në Laknas kanë nisur vendosjet e strukturave mbështetëse, ndërsa trafiku është devijuar përkohësisht. Këto punime pritet të zgjasin rreth 45–50 ditë.
Ndërkohë, në Rinas po kryhen ndërhyrje për zhvendosje infrastrukture dhe përgatitje për demontimin e mbikalimit ekzistues, i cili do të zëvendësohet me një strukturë të re më të gjerë, rreth 94 metra e gjatë.
Autoritetet sqarojnë se gjatë kësaj faze qarkullimi do të devijohet përmes rrugëve alternative, përfshirë rrugën ekzistuese pa pagesë dhe lidhjet përmes Vorës.
Projekti përfshin gjithashtu gjelbërim përgjatë aksit, ndriçim të ri dhe zgjerim të mbikalimeve për këmbësorët, të cilat do të jenë gjashtë në total.
Sa i përket fazave të tjera, Autoriteti Rrugor Shqiptar synon të nisë punimet për segmentet e reja gjatë vitit 2026, duke përfshirë zonën nga Vorë deri në Fushë-Krujë.
Ky investim konsiderohet një nga projektet më të rëndësishme infrastrukturore në vend, që pritet të përmirësojë ndjeshëm qarkullimin dhe sigurinë në një nga akset më të frekuentuara në Shqipëri.
