Analisti Preç Zogaj ka kritikuar ashpër procesin zgjedhor për kreun e Partia Demokratike e Shqipërisë, duke e cilësuar atë si një farsë dhe jo një garë reale.
Në një deklaratë televizive, ai u ndal te përjashtimi nga gara i figurave si Ervin Salianji dhe kandidatë të tjerë kritikë, duke theksuar se procesi po zhvillohet “sa për të bërë një adet” dhe pa konkurrencë të vërtetë.
Sipas Zogajt, ndalimi i kandidaturave po e dëmton seriozisht partinë, pasi garat e hapura janë thelbësore për të gjallëruar një forcë politike dhe për të rritur besimin e anëtarësisë dhe të publikut.
Ai u shpreh se kjo praktikë po çon në një “skemë zvogëlimi” të PD-së, duke reduktuar hapësirat për mendim ndryshe dhe konkurrencë të brendshme. Zogaj shtoi se premtimet për hapje, garë të lirë dhe diversitet mendimesh, të bëra gjatë procesit të Rithemelimit, nuk janë reflektuar në realitet.
Analisti theksoi gjithashtu se nuk e kupton arsyen pse nuk lejohet gara, duke qenë se sipas tij Sali Berisha mbetet figura dominuese dhe vështirë të sfidohet në kushtet aktuale.
Në përfundim, ai nënvizoi se përjashtimi i kandidatëve dhe mungesa e konkurrencës reale rrezikojnë të dobësojnë më tej Partinë Demokratike dhe të ndikojnë negativisht në të ardhmen e saj politike.
