Inspektori i Lartë i Drejtësisë, Artur Metani, ka zhvilluar një vizitë zyrtare në Shtetet e Bashkuara të Amerikës, ku ka realizuar një sërë takimesh në shtetet Texas dhe Florida, me fokus forcimin e bashkëpunimit në fushën e drejtësisë.
Në Texas, Metani u prit nga përfaqësues të institucioneve lokale, ndërsa takimet u zhvilluan me mbështetjen e anëtarit të Këshillit të Qarkut Conroe, Harry Hardman, dhe organizatës Open Gov Hub Albania. Diskutimet u përqendruan në thellimin e dialogut ndërinstitucional dhe shkëmbimin e praktikave profesionale.
Një moment simbolik i vizitës ishte ceremonia në Kapitolin e shtetit në Austin, ku flamuri u ngrit për një ditë në nder të Metanit dhe më pas iu dorëzua atij nga autoritetet vendore.
Gjatë qëndrimit në Texas A&M University, në Shkollën Bush të Qeverisjes dhe Shërbimit Publik, u diskutua për bashkëpunim akademik dhe programe trajnimi që synojnë rritjen e kapaciteteve institucionale të Inspektoratit të Lartë të Drejtësisë.
Në Prokurorinë e Qarkut Montgomery, Metani zhvilloi një takim me prokurorin Mike Holley, ku u shkëmbyen përvoja mbi pavarësinë institucionale, integritetin dhe forcimin e shtetit të së drejtës. Në këtë takim, ai u vlerësua edhe me një certifikatë mirënjohjeje për kontributin e tij.
Vizita përfshiu gjithashtu takime me gjyqtarë të Gjykatës së 9-të të Apelit të Texas-it dhe një ndalesë në Parkun Përkujtimor të Veteranëve të Qarkut Montgomery.
Në vijim të agjendës, Metani qëndroi edhe në Florida, ku zhvilloi takime me gjyqtarë federalë dhe përfaqësues të University of South Florida. Diskutimet u fokusuan në organizimin e sistemit të drejtësisë, etikën gjyqësore dhe bashkëpunimin akademik.
Sipas njoftimit zyrtar, kjo vizitë synon të forcojë bashkëpunimin ndërkombëtar dhe të ndihmojë në përafrimin e sistemit shqiptar të drejtësisë me standardet dhe praktikat më të mira ndërkombëtare.
