Kreu i Partisë Demokratike, Sali Berisha, ka dhënë udhëzime të qarta për strukturat drejtuese të partisë gjatë mbledhjes së Kolegjit të Kryetarëve, duke kërkuar intensifikim të kontaktit me qytetarët dhe mobilizim për protesta.
Në fjalën e tij, Berisha theksoi se kryetarët e degëve, koordinatorët, drejtuesit politikë dhe kryebashkiakët duhet të kenë një agjendë të vazhdueshme takimesh në terren. Sipas tij, kjo është një fazë vendimtare ku komunikimi i drejtpërdrejtë me qytetarët duhet të jetë prioritet absolut.
“Ne duhet të vazhdojmë dhe të insistojmë në dialog intensiv me çdo qytetar shqiptar,” u shpreh ai, duke shtuar se opozita ka vetëm dy mjete kryesore komunikimi: takimet në terren dhe rrjetet sociale.
Berisha akuzoi gjithashtu kryeministrin Edi Rama se shmang kontaktin me qytetarët dhe mbështetet vetëm te propaganda dhe strukturat partiake, ndërsa opozita, sipas tij, “ulet, dëgjon, debaton dhe pranon kritikat”.
Ai u bëri thirrje drejtuesve lokalë që të jenë sa më aktivë në çdo zonë, duke kërkuar një shtrirje të plotë territoriale të Partisë Demokratike dhe raportim të përditshëm mbi aktivitetin në terren.
“Duhet të shkoni në çdo zonë, me çdo mjet, të takoni njerëzit, të dëgjoni problemet dhe të jepni zgjidhje,” tha Berisha, duke e cilësuar këtë një detyrë kyçe në këtë moment politik.
Në fund, ai theksoi se opozita ndodhet në një fazë vendimtare, duke deklaruar se “jemi në kilometrin e fundit”, ndërsa identifikoi kundërshtarin kryesor politik si kryeministrin Rama. Sipas tij, protesta mbetet mjeti më i rëndësishëm për të arritur ndryshimin.
“Koha ka provuar se protesta është arma jonë më kryesore,” përfundoi Berisha, duke paralajmëruar intensifikim të aksioneve opozitare në ditët në vijim.
