Drejtuesi i Departamentit për Mbrojtjen e Familjes në Partinë Demokratike, Aulon Kalaja, ka kritikuar ashpër qeverinë për mungesë reagimi ndaj rritjes së çmimeve, veçanërisht të karburanteve, duke e cilësuar situatën si një krizë të rëndë për familjet shqiptare.
Në një intervistë televizive, Kalaja u shpreh se çmimi i naftës ka arritur nivele rekord dhe po ndikon drejtpërdrejt në të gjitha sektorët e ekonomisë, duke rritur koston e produkteve bazë si ushqimet dhe shërbimet.
Ai theksoi se, ndryshe nga vendet e Evropës Perëndimore që po ndërmarrin masa konkrete si ulja e taksave mbi karburantin, në Shqipëri mungon çdo reagim efektiv nga ana e shtetit.
Sipas tij, rritja e çmimeve po krijon një efekt domino në ekonomi, duke prekur zinxhirin e furnizimit dhe duke rënduar më tej jetesën e qytetarëve, në një kohë kur të ardhurat mbeten të ulëta.
Kalaja ngriti gjithashtu shqetësimin për mungesën e politikave mbështetëse për sektorin bujqësor, duke theksuar se edhe pse Shqipëria ka potencial të madh në këtë fushë, çmimet e produkteve ushqimore vijojnë të rriten.
Në analizën e tij, ai vuri në pikëpyetje edhe rolin e shtetit në menaxhimin e krizës, duke kritikuar rritjen e administratës dhe mungesën e masave konkrete për të lehtësuar barrën ekonomike mbi qytetarët.
