Deputetja socialiste dhe ish-ministre e Jashtme, Elisa Spiropali, ka reaguar publikisht mbi zhvillimet e fundit politike dhe funksionimin e institucioneve në vend.
Përmes një postimi në rrjetet sociale, ajo theksoi se Shqipëria duhet të fokusohet në ndërtimin e institucioneve që funksionojnë realisht dhe jo vetëm ekzistojnë formalisht. Sipas saj, problematika kryesore nuk qëndron te konflikti politik në vetvete, por te fakti që ai po zëvendëson funksionin normal të institucioneve.
Spiropali u ndal veçanërisht te roli i Parlamentit, duke theksuar se ai nuk po arrin të ushtrojë si duhet funksionin përfaqësues dhe kontrollues. Ajo paralajmëroi se dobësimi i këtij funksioni sjell rënie të besimit publik dhe dëmton vetë konceptin e republikës parlamentare.
Në këtë kontekst, ajo nënvizoi se Bashkimi Europian pret nga Shqipëria institucione të qëndrueshme dhe funksionale, duke sugjeruar se ky standard duhet të kërkohet fillimisht nga vetë shoqëria shqiptare.
Reagimi i saj vjen në një moment tensioni politik, pas debateve në Kuvend dhe deklaratave të kryeministrit Edi Rama, i cili ka paralajmëruar se procesi i integrimit në BE mund të rrezikohet nëse humbet momenti aktual.
Këto qëndrime reflektojnë debatet e vazhdueshme brenda politikës shqiptare mbi funksionimin e institucioneve dhe ecurinë e procesit të integrimit europian.
