Gara për drejtimin e Partia Demokratike e Shqipërisë po bëhet gjithnjë e më konkurruese, teksa një tjetër emër i është shtuar listës së kandidatëve për zgjedhjet e 23 majit.
Aktivistja dhe anëtarja e PD-së, Alesia Balliu, ka konfirmuar publikisht se do të hyjë në garë për kreun e partisë, duke sfiduar drejtpërdrejt liderin aktual Sali Berisha.
Në një intervistë televizive, Balliu bëri të ditur se në ditët në vijim do të paraqesë platformën e saj dhe do të dorëzojë dokumentacionin për kandidim. Ajo theksoi eksperiencën e saj në strukturat e partisë, duke përmendur rolin e mëparshëm në forumin rinor dhe angazhimin në qarkun e Elbasanit.
Balliu u shfaq kritike ndaj lidershipit aktual, duke deklaruar se Partia Demokratike ka nevojë për rinovim dhe energji të reja. “Koha e Sali Berishës ka përfunduar”, u shpreh ajo, duke shtuar se një figurë e re dhe e pakorruptuar është ajo që kërkojnë aktualisht demokratët.
Ajo e prezantoi veten si një alternativë ndryshe, duke theksuar se përfaqëson brezin e ri dhe një qasje të re politike brenda partisë.
Ndërkohë, burime pranë Ervin Salianji bëjnë me dije se edhe ai pritet të jetë pjesë e garës, ndërsa kandidaturën e ka shpallur më herët edhe aktivistja shqiptaro-amerikane Evi Kokalari.
Me shtimin e kandidatëve, gara për kreun e PD-së po bëhet më e hapur, duke reflektuar debatet dhe dinamikat e brendshme në opozitë për drejtimin dhe të ardhmen e saj politike.
