Anëtarët e Partisë Demokratike në Komisionin e Jashtëm të Kuvendit kanë kërkuar zhvillimin e një seance dëgjimore me kryeministrin Edi Rama lidhur me një editorial të përbashkët që ai ka publikuar me presidentin serb Aleksandër Vuçiç mbi procesin e integrimit europian.
Editoriali, i publikuar në një media gjermane, propozon që vendet e Ballkanit Perëndimor të integrohen gradualisht në tregun e brendshëm të Bashkimit Europian dhe në zonën Schengen, edhe pa qenë ende anëtare të plota të unionit.
Sipas përfaqësuesve të opozitës, kjo qasje bie ndesh me rezolutat e miratuara më parë nga Kuvendi i Shqipërisë, të cilat synojnë anëtarësimin e plotë të vendit në Bashkimin Europian.
Për këtë arsye, demokratët kërkojnë që kryeministri Rama të japë sqarime lidhur me këtë iniciativë dhe qëndrimin e qeverisë shqiptare për procesin e integrimit.
Në kërkesën e tyre theksohet gjithashtu shqetësimi për ndikimin që mund të ketë kjo qasje në interesat strategjike të Shqipërisë dhe Kosovës, si dhe në perspektivën e integrimit europian të rajonit.
