Presidenti i Emirateve të Bashkuara Arabe, Mohammed bin Zayed Al Nahyan, ka dërguar një mesazh të fortë ndaj Iranit, duke deklaruar se vendi i tij nuk është “pre e lehtë” dhe se është i gatshëm të mbrojë veten nga çdo kërcënim.
Deklarata e tij erdhi gjatë një vizite në një spital ku po trajtoheshin civilë të plagosur nga sulmet e fundit në rajon.
“Emiratet e Bashkuara Arabe janë të bukura, janë një model që duhet ndjekur, por mos u mashtroni nga kjo. Dora e Emirateve të Bashkuara Arabe mund të arrijë dhe është e fortë. Ne nuk jemi pre e lehtë”, u shpreh ai.
Në fjalën e tij, presidenti i Emirateve iu referua Iranit si një “armik”, duke shënuar një ndryshim të dukshëm nga toni diplomatik që Abu Dhabi ka mbajtur zakonisht ndaj Teheranit.
Komentet e tij vijnë në një moment tensionesh të shtuara në rajonin e Gjirit, ndërsa mbrojtja ajrore e Emirateve të Bashkuara Arabe reagoi së fundmi ndaj një kërcënimi me raketa.
Deklaratat janë gjithashtu ndër reagimet e para publike të Mohammed bin Zayed që nga shpërthimi i konfliktit të fundit në rajon, në një kohë kur situata e sigurisë në Lindjen e Mesme mbetet e tensionuar.
