Në Moskë po rritet shqetësimi për skadimin e marrëveshjes së fundit për kontrollin e armëve bërthamore, ndërsa në prapaskenë po kristalizohet frika se një garë e re armatimi do ta gjente Rusinë në disavantazh të thellë përballë Shteteve të Bashkuara.
Pas raundit të dytë të bisedimeve mes SHBA-së, Ukrainës dhe Rusisë, palët kanë shmangur detajet, por sinjalet politike janë bërë gjithnjë e më të qarta. Nga pala ruse është theksuar se çdo marrëveshje është e pamundur pa dorëzimin e territorit të Donbasit nga Ukraina, ndërsa Kievi akuzon Moskën se nuk është realisht e interesuar për paqe.
Ndërkohë, luftimet vijojnë, veçanërisht ndaj infrastrukturës energjetike ukrainase, duke e kthyer presionin ushtarak në mjet negociues. Edhe pse është arritur një shkëmbim i kufizuar të burgosurish, analistët e shohin situatën si një “stabilitet negativ”: as përparim real, as kolaps diplomatik, por rritje e kostove dhe tensioneve.
Shqetësimi kryesor për Kremlinin mbetet përfundimi i Traktatit Strategjik për Kontrollin e Armëve Bërthamore. Pa këtë mekanizëm, Rusia përballet me një realitet të ashpër: SHBA-të janë ekonomikisht dhe teknologjikisht shumë më të fuqishme dhe, në një garë të hapur bërthamore, mund ta tejkalojnë Moskën pa vështirësi serioze.
Shpresat ruse se skadimi i traktatit do të çonte në tërheqjen e armëve bërthamore amerikane nga Evropa nuk janë materializuar. Përkundrazi, po flitet për forcimin e kapaciteteve parandaluese europiane, ndërsa Uashingtoni kërkon një marrëveshje të re që të përfshijë edhe Kinën – diçka që Pekini e ka refuzuar kategorikisht.
Nga ana ruse, çdo zgjerim i pranisë bërthamore pranë kufijve shihet si kërcënim ekzistencial, pavarësisht nëse vjen nga vende mike apo armike. Në të njëjtën kohë, çdo modernizim i arsenalit rus rrezikon të perceptohet si përshkallëzim nga fqinjët dhe NATO.
Analistët paralajmërojnë se rënia e START-it është një lajm i keq për sigurinë globale. Pa inspektime të ndërsjella dhe mekanizma transparence, rritet rreziku i keqkuptimeve dhe përshkallëzimeve të rrezikshme. Madje, ekziston frika se SHBA-të mund të rikthehen edhe te testimet bërthamore, duke hapur një kapitull të errët për stabilitetin ndërkombëtar.
Në këtë kontekst, Moska gjendet në një pozicion të pakëndshëm strategjik: e varur gjithnjë e më shumë nga lufta si mjet politik, por gjithnjë e më e vetëdijshme se në një përballje afatgjatë ekonomike dhe bërthamore, balanca e fuqisë nuk është më në favorin e saj.
