Kriza politike që ka shpërthyer në Britani po merr përmasa të rënda, teksa skandali i lidhur me çështjen Epstein ka vënë në rrezik serioz pozicionin e kryeministrit. Reagimet e tij të fundit, përfshirë kërkimin e faljes publike ndaj viktimave, kanë thelluar zemërimin brenda partisë dhe opinionit publik.
Kryeministri u detyrua të pranojë se ka gabuar rëndë në emërimin e një figure të lartë diplomatike, pavarësisht dyshimeve dhe informacioneve të mëparshme për lidhje problematike me Epstein. Ky veprim është konsideruar nga deputetët si një shkelje e rëndë e besimit dhe transparencës.
Zëra të fortë nga radhët e mazhorancës e cilësojnë situatën si të paqëndrueshme dhe thonë se dorëheqja është e pashmangshme. Deputetë të tjerë flasin për një qeveri që ka humbur kontrollin dhe për një udhëheqje që nuk ka më autoritet moral.
Edhe pse ende nuk ka një kërkesë formale për largim të menjëhershëm, klima politike është rënduar ndjeshëm. Analistët theksojnë se kryeministri është më i dobët politikisht se kurrë më parë dhe se çdo zhvillim i ri mund të përshpejtojë fundin e tij në krye të qeverisë.
