Prokuroria e Posaçme ka dhënë pretencën për 15 ish-zyrtarë të Ministrisë së Brendshme, të akuzuar për shkelje procedurash dhe falsifikim dokumentesh në tenderat për rikonstruksionin e katër komisariateve të policisë në Vlorë, Tiranë (nr. 4), Pogradec dhe Mirditë.
SPAK ka kërkuar në total 11 vite e 3 muaj burg për të pandehurit. Për 9 ish-zyrtarë është kërkuar dënimi me 9 muaj burg, i cili zbret në 6 muaj për shkak të gjykimit të shkurtuar. Për disa prej tyre, prokuroria ka kërkuar pezullimin e dënimit dhe vendosjen në shërbim prove për një vit.
Për gratë e përfshira në dosje, SPAK ka kërkuar që të mos shkojnë në burg edhe nëse shpallen fajtore, ndërsa për burrat, përfshirë Blendi Kovin, është kërkuar dënim me 9 muaj burg, i reduktuar në 6 muaj me gjykim të shkurtuar. Për të gjithë 15 të pandehurit është kërkuar gjithashtu heqja e së drejtës për të ushtruar funksione publike për një periudhë 5-vjeçare.
Çështja ndaj ish-sekretarit të përgjithshëm të Ministrisë së Brendshme, Plarent Ndreca, është ndarë dhe ai do të gjykohet me procedurë të zakonshme. Në kuadër të hetimeve është marrë në pyetje edhe ish-ministri i Brendshëm, Sandër Lleshaj.
Sipas SPAK, tenderat për supervizimin e katër komisariateve kapnin vlerën rreth 555 mijë euro dhe janë kryer në shkelje të procedurave ligjore për të favorizuar një kompani të caktuar.
