Avokati Alban Duraj deklaroi se Prokuroria e Posaçme ka vendosur masën e ndalimit të daljes jashtë vendit për zëvendëskryeministren Belinda Balluku, pasi ka vlerësuar se ekziston rreziku i arratisjes. Sipas tij, bllokimi i pasaportës është një masë sigurimi e zakonshme në raste të tilla, kur organi i akuzës çmon se personi nën hetim mund të largohet nga vendi.
Duraj theksoi se rekursi i depozituar nga Balluku në Gjykatën e Lartë kundër kësaj mase është një e drejtë ligjore, por vuri në dukje se ajo nuk ka kundërshtuar pezullimin nga detyra. Sipas avokatit, pezullimi i një anëtari të Këshillit të Ministrave nuk kërkon autorizim nga Kuvendi dhe nuk lidhet me imunitetin parlamentar, i cili aplikohet vetëm për masat shtrënguese si arresti apo arresti shtëpiak.
Ai shtoi se mbledhja e Këshillit të Mandateve nuk duhej të ishte shtyrë, pasi kërkesa e SPAK për masë arresti nuk ka lidhje me vendimin që pritet nga Gjykata Kushtetuese për pezullimin nga detyra. Sipas tij, zvarritja e këtij procesi krijon konfuzion dhe ushqen perceptimin e ndërhyrjes politike në drejtësi.
Avokati ngriti gjithashtu shqetësime për presionet ndaj institucioneve të drejtësisë dhe theksoi se zyrtarët e lartë duhet të trajtohen njësoj si qytetarët e zakonshëm përpara ligjit. Ai nënvizoi se vetëm një sistem gjyqësor i pavarur, i sigurt dhe i mirëpaguar mund të garantojë drejtësi reale në vend.
