Kryeministri Edi Rama, gjatë një takimi me kryebashkiakët, ka pranuar se përmbytjet e fundit kanë nxjerrë në pah problematika serioze në funksionimin e hidrovoreve dhe rrjetit të kanaleve kulluese, duke theksuar se infrastruktura mbrojtëse ka pika të dobëta që kërkojnë ndërhyrje të menjëhershme.
Sipas Ramës, intensiteti i lartë i reshjeve është një faktor i vështirë për t’u kontrolluar, por situata është përkeqësuar ndjeshëm nga papërgjegjshmëria njerëzore dhe menaxhimi i dobët i mbetjeve, veçanërisht në zonat rurale. Ai u ndal te bllokimi i kanaleve kulluese nga plastika dhe mbeturinat, duke përmendur raste konkrete në Shkozet, Gjirokastër dhe zona të tjera problematike.
“Kjo është një lemeri papërgjegjshmërie qytetare. Nuk është krim i turistëve, por krim shqiptar. Mbetjet plastike bllokojnë pikat kyçe të kullimit, derdhen në det dhe sjellin dëme të pariparueshme për mjedisin dhe ushqimin tonë,” u shpreh Rama.
Kryeministri njoftoi se i ka kërkuar Ministrisë së Pushtetit Vendor ngritjen e një Task Force, e cila do të hartojë një plan me tre faza:
- Sensibilizim masiv i qytetarëve,
- Ndërhyrje të koordinuara në terren,
- Masa strukturore dhe forcim të kontrollit institucional.
Ai pranoi gjithashtu se, ndonëse infrastruktura mbrojtëse është përmirësuar ndjeshëm gjatë dekadës së fundit, ekzistojnë ende zona ku kapaciteti i hidrovoreve dhe kanaleve kulluese nuk e përballon dot volumin e prurjeve.
“Nga analiza rezulton se ka pika ku rezistenca është më e dobët. Duhet të vendosim me saktësi ku të forcojmë infrastrukturën dhe të rrisim bashkëpunimin mes pushtetit vendor dhe institucioneve qendrore,” tha Rama.
Si masë konkrete, kryeministri bëri të ditur se është miratuar propozimi për blerjen e mjeteve të reja që do të përdoren posaçërisht për pastrimin dhe mirëmbajtjen e kanaleve kulluese, me qëllim parandalimin e përmbytjeve në të ardhmen.
Në përfundim, Rama theksoi se përballja me përmbytjet kërkon jo vetëm investime infrastrukturore, por edhe ndryshim të sjelljes qytetare dhe reagim të shpejtë institucional.
