Një 31-vjeçar ka përfunduar në prangat e Policisë së Tiranës pasi u kap duke mbajtur pa leje një armë zjarri në banesën e tij. Arrestimi u krye në fshatin Lalm, në zonën e Vaqarrës, gjatë një operacioni policor të zhvilluar për goditjen e armëmbajtjes pa leje.
Gjatë kontrollit në banesë, shërbimet e policisë gjetën dhe sekuestruan një pushkë, e cila mbahej në kundërshtim me ligjin. Arma u sekuestrua në cilësinë e provës materiale, ndërsa ndaj të riut u bë arrestimi në flagrancë.
Operacioni policor, i zhvilluar pas informacioneve të siguruara në rrugë operative, kishte si qëllim parandalimin e rasteve që rrezikojnë sigurinë publike dhe rendin në komunitet. Sipas policisë, kontrollet janë pjesë e një fushate të vazhdueshme për të çarmatosur individët që mbajnë armë pa autorizim ligjor.
Materialet procedurale i janë referuar Prokurorisë së Tiranës për veprime të mëtejshme, ndërsa hetimet vijojnë për të zbardhur nëse arma kishte lidhje me ndonjë ngjarje tjetër kriminale.
