Një 36-vjeçar shqiptar është arrestuar në Itali si pjesë e një hetimi për trafik kokaine, por më pas është liruar nga gjykata me masa sigurie, pavarësisht sjelljes së dyshimtë gjatë kontrollit policor.
Ngjarja ka ndodhur në zonën e San Benedetos, përgjatë rrugës Salaria, pranë Monsampolos, ku shqiptari u ndalua nga një patrullë gjatë një kontrolli rutinë. Sapo u ndalua, ai u kyç brenda automjetit dhe refuzoi të dalë për disa minuta, duke ngritur dyshime te efektivët.
Pas ndërhyrjes së policisë, dera e makinës u hap dhe kontrolli vijoi si ndaj drejtuesit të mjetit ashtu edhe ndaj automjetit. Gjatë kontrollit, oficerët gjetën rreth 50 gramë kokainë të fshehur brenda kapuçit të një xhupi që ndodhej në makinë.
Pas këtij zbulimi, autoritetet zgjeruan kontrollin edhe në banesën e 36-vjeçarit, me ndihmën e qenve antidrogë. Megjithatë, në apartament nuk u gjetën sasi të tjera lëndësh narkotike.
Shqiptari u arrestua dhe iu sekuestruan droga si edhe disa sende personale, përfshirë një telefon inteligjent. Nga analizat paraprake rezultoi se telefoni ishte fshirë plotësisht nga kontaktet dhe regjistri i thirrjeve, veprim që dyshohet se është kryer për të penguar hetuesit në identifikimin e bashkëpunëtorëve dhe rrjetit të shpërndarjes së drogës.
Gjatë seancës gjyqësore të përshpejtuar, gjykata konfirmoi arrestimin, por vendosi lirimin e të dyshuarit, duke i caktuar masën e paraqitjes së përditshme pranë autoriteteve gjyqësore. Seanca e radhës pritet të mbahet në fillim të janarit.
36-vjeçari akuzohet për posedim të lëndëve narkotike me qëllim shpërndarjen dhe për rezistencë ndaj forcave të rendit, ndërsa hetimet për zbardhjen e plotë të rrjetit vijojnë.
