Tensioni politik dhe qytetar para Kryesisë së Kuvendit ka njohur një tjetër kulm këtë paradite, teksa partia “Mundësia” ka dalë në protestë kundër zëvendëskryeministres Belinda Balluku, e cila është e pandehur nga SPAK për shkelje të barazisë në tendera.
Me pankarta, thirrje të forta dhe tymuese, protestuesit kanë kërkuar dorëheqjen e menjëhershme të Ballukut, duke e lidhur çështjen drejtpërdrejt me standardet e drejtësisë dhe integrimin europian të vendit. Mesazhet kryesore të pankartave ishin:
- “Dil nga zyra dhe jep dorëheqjen”
- “Pa drejtësi nuk ka BE”
- “Jo shtetit që të merr peng”
Protesta zhvillohet në të njëjtën kohë kur brenda Kryesisë së Kuvendit po vijon mbledhja e Këshillit për Rregulloren, Mandatet dhe Imunitetin, ku po shqyrtohet kërkesa e SPAK për heqjen e imunitetit parlamentar të Belinda Ballukut. Ky vendim pritet t’i hapë rrugë masave të mëtejshme penale ndaj saj.
Përfaqësuesit dhe mbështetësit e partisë “Mundësia” kanë theksuar se një zyrtare e lartë e pandehur nuk mund të vazhdojë të qëndrojë në detyrë, duke e cilësuar këtë si pengesë për drejtësinë dhe për rrugën europiane të Shqipërisë.
Protesta e sotme i shtohet presionit të fortë publik dhe politik mbi institucionet, ndërsa vendimmarrja e Kuvendit për imunitetin e Ballukut po shihet si një provë reale për funksionimin e shtetit të së drejtës dhe besueshmërinë e reformës në drejtësi.
