Një 28-vjeçar shqiptar është arrestuar në provincën e Breshias, pasi dyshohet se ishte pjesë e një rrjeti që shpërndante kokainë në zonën e Lenos, me doza që shiteshin për 40 euro.
Arrestimi u krye dy ditë më parë, pas një kontrolli rutinë të policisë rrugore, i cili rezultoi vendimtar për zbulimin e drogës.
Nervozizmi i shoferit ngriti dyshime
Efektivët ndaluan një automjet tip “Lancia” që po lëvizte me shpejtësi mbi normë. Shoferi shqiptar paraqiti dokumentet, por sjellja e tij e pasigurt dhe nervozizmi i tepruar i shtynë policët të ushtronin një kontroll më të thelluar.
Ndërkohë, një person tjetër që zbriste nga makina u verifikua po ashtu, duke rritur dyshimet për një aktivitet të paligjshëm.
Kokaina e fshehur në ndarjen e frenit të dorës
Gjatë kontrollit në automjet, policia gjeti pesë doza kokaine të futura me kujdes në ndarjen qendrore të levës së frenit të dorës. Personit të dytë, të kontrolluar pak metra më larg, iu gjet një dozë kokaine që dyshohet se sapo e kishte blerë nga 28-vjeçari.
Së bashku me drogën, policia sekuestroi edhe 40 euro para të gatshme — shuma që blerësi kishte paguar për dozën.
Dënim i menjëhershëm dhe dëbim nga Italia
Shqiptari u arrestua në flagrancë dhe u dënua në kohë rekord me gjashtë muaj burg dhe një gjobë prej 1,000 euro, por u la i lirë me kusht për shkak të procedurës së përshpejtuar.
Të premten në mëngjes, Gjykata e Breshias urdhëroi dëbimin e menjëhershëm të tij nga territori italian. I riu pritet të riatdhesohet përmes aeroportit Orio al Serio, me destinacion Tiranën.
