Greqia po përjeton një situatë të rëndë emergjence nga stuhia e fuqishme “Byron”, e cila prej ditësh ka shkaktuar dëme të mëdha materiale, përmbytje masive dhe rrezik të drejtpërdrejtë për jetën e qytetarëve.
Sipas autoriteteve, mbi 800 km² sipërfaqe është përfshirë nga moti ekstrem, ndërsa përhapja e stuhisë po rritet me ritme të shpejta. Nga Selaniku e Janina, deri në Athinë dhe Kretë, pothuajse i gjithë vendi është paralizuar, ndërsa pamjet dramatike kanë pushtuar rrjetet sociale.
Pas ngjarjes së një dite më parë, kur një familje rrezikoi të merrej nga rrjedha e fuqishme e ujit, sot një tjetër episod tronditës është regjistruar në Megara dhe Nea Peramos, ku përmbytjet kanë mbuluar rrugët brenda pak minutash.
Në një foto të publikuar nga nënkryetari i bashkisë, Dimitris Vordos, shihet një grua e rrethuar nga uji, e cila përpiqet me vështirësi të dalë nga automjeti i saj i bllokuar në mes të rrjedhës.
Sipas Vordos, lumi në zonën e Kamaras është fryrë ndjeshëm, pasi prurjet e ujit po rrjedhin me forcë drejt Lakkës dhe Almyres. Ai apeloi qytetarët që të zhvendosen menjëherë në zona më të larta për të shmangur rrezikun.
