Ish-zv.ministri i Brendshëm, Avenir Peka, deklaroi në emisionin “Oponencë” se Partia Demokratike është ende gjallë politikisht dhe se fakti që vijon të prodhojë lajme tregon se nuk ka humbur funksionin e saj si forcë opozitare. Ai theksoi se situata e PD-së është krejt e kundërta e asaj që, sipas tij, përjeton Partia Socialiste, të cilën e cilësoi si një strukturë të ngurtë, me heshtje të plotë të brendshme.
Sipas Pekës, PD ka kaluar një periudhë të jashtëzakonshme sulmesh, jo vetëm të brendshme, por edhe nga ajo që ai e përshkroi si “e majta globale”. Ai u shpreh se lëvizja e “Foltores” e ringriti partinë dhe e mbajti në ekzistencë në një moment kur, siç theksoi ai, vihej në pikëpyetje vetë mbijetesa e PD-së.
“Sot flitet për PD-në dhe kjo është dëshmi që partia jeton. Edhe pse ka humbur zgjedhjet disa herë radhazi dhe mediat pranë qeverisë e kanë trajtuar sikur ka vdekur, fakti që prodhon interes e tregon të kundërtën,” u shpreh Peka. Ai shtoi se teksa PD ka kaluar nëpër debate, garë dhe lëvizje të brendshme politike, në PS nuk ka pasur lëvizje të ngjashme prej vitesh.
Peka e përshkroi marrëdhënien e drejtuesit të PS-së me strukturat e partisë si “model mafioz”, duke ngritur pretendime se kundërshtimi i kryetarit në radhët socialiste sjell rreziqe edhe personale. Sipas tij, mungesa e çdo debati të brendshëm brenda PS-së është tregues i një strukture të mbyllur dhe të frikësuar.
Duke folur për situatën e viteve të fundit në PD, Peka kujtoi momentet e vështira të dhjetorit të vitit të kaluara, të cilat i përshkroi si “kohë kur në stadium ishim vetëm ne dhe Zoti”, duke theksuar presionin e madh politik dhe ndërkombëtar mbi partinë. “Kishim gjithë botën kundër,” tha ai, duke theksuar se rezistenca e strukturave dhe mbështetësve e mbajti PD-në në këmbë.
Ai shtoi se, sipas tij, Edi Rama ndodhet sot në një situatë të ngjashme me atë që përjetoi PD në vitin 1996: një moment ku pushteti duket i pakufizuar, por që, sipas Pekës, mund të ketë pasoja të papritura. “Rama ka qëndruar në pushtet jo për shkak të legjitimitetit të brendshëm, por falë mbështetjes së jashtme, të majtës globale,” u shpreh ai, duke pretenduar se aleancat ndërkombëtare kanë luajtur rol të rëndësishëm në mbajtjen e tij në pushtet.
Në përfundim, Peka deklaroi se lëvizjet e fundit brenda PD-së janë shenjë e një partie që jeton, ndërsa sipas tij PS është shndërruar në një strukturë “semi-mafioze”, e paaftë për debat dhe garë të brendshme politike.
