Ndërsa bisedimet për Ukrainën nuk tregojnë asnjë përparim real, NATO ka vendosur të shtojë presionin ndaj Rusisë përmes mbështetjes së vazhdueshme ushtarake për Kievin. Në takimin e ministrave të Jashtëm në Bruksel, vendet aleate ranë dakord që edhe gjatë vitit të ardhshëm të lëvrojnë miliarda për blerjen e armëve dhe municioneve. Sekretari i Përgjithshëm i NATO-s, Mark Rutte, deklaroi se çdo muaj do të kryhen blerje të paktën 1 miliard dollarë nga prodhimet amerikane. Pakoja përfshin raketa për sistemet mbrojtëse ajrore, municione dhe sisteme sulmuese. Sipas të dhënave fillestare, vlera totale mund të arrijë deri në 15 miliardë dollarë. Edhe Gjermania pritet të ketë një rol financiar të rëndësishëm. Ministri i Jashtëm, Johann Wadephul, njoftoi se vendi do të kontribuojë me 200 milionë dollarë për dy paketa të reja armatimesh të blera nga SHBA-ja, në bashkëpunim me Poloninë, Norvegjinë dhe Holandën. Këto fonde nuk përfshihen në buxhetin e vitit 2026. Përveç kësaj, Gjermania do të paguajë 25 milionë euro në fondin e NATO-s për pajisjen dimërore dhe shërbimet shëndetësore të trupave ukrainase. Sa i përket procesit të negociatave, Rutte e përshkroi situatën si të paqartë dhe tha se është thelbësore që Ukraina të hyjë në çdo bisedim të mundshëm nga një pozicion sa më i fortë ushtarak. Wadephul ishte edhe më skeptik, duke theksuar se nuk sheh asnjë gatishmëri të sinqertë nga Rusia për t’u përfshirë në bisedime të mirëfillta. Pas takimeve të përfaqësuesit amerikan Steve Witkoff me presidentin rus Vladimir Putin, pala ukrainase ka nisur konsultime të reja me aleatët. Kryenegociatori Rustem Umjerov zhvilloi takime në Bruksel me këshilltarët e sigurisë të vendeve të NATO-s dhe me drejtues të qeverive evropiane, siç njoftoi presidenti Volodymyr Zelenskyj. Më pas pritet të zhvillohet një raund tjetër konsultimesh me Shtetet e Bashkuara.