Ernest Muçi vazhdon të lërë gjurmë në futbollin turk. Sulmuesi shqiptar i Trabzonspor-it ka realizuar një nga golat më të bukur të javës në Superligën turke, duke mahnitur tifozët me një ekzekutim perfekt nga goditja e lirë në sfidën kundër Konyaspor-it.
Muçi goditi saktë dhe me teknikë të lartë nga një “kënd i vdekur”, pikë prej nga shumë lojtarë zgjedhin asistin dhe jo goditjen direkte. Por shqiptari befasoi portierin dhe gjithë stadiumin, duke dërguar topin në rrjetë me një trajektore brilante. Goli ishte i treti në këtë sfidë dhe vulosi fitoren 3-1 të Trabzonspor-it.
Reagimi i tifozëve dhe shokëve të skuadrës ishte i menjëhershëm: duartrokitje, përqafime dhe vlerësime për një moment teknik të rrallë, që dëshmoi formën e shkëlqyer të Muçit.
Sulmuesi shqiptar po kalon një periudhë pozitive në Turqi dhe ky gol spektakolar e rrit edhe më shumë profilin e tij. Muçi synon të vazhdojë me këtë ritëm, ndërsa shpreson të rikthehet shpejt te Kombëtarja e Shqipërisë nën drejtimin e Sylvinhos. Performanca kundër Konyaspor-it është një mesazh i qartë se shqiptari është gati të marrë përgjegjësi dhe të ndriçojë edhe në skenat ndërkombëtare.
