Në Kopenhagen, Danimarkë, është hapur sot Samiti i 7-të i Komunitetit Politik Evropian, ku pritet të marrin pjesë liderë nga gjithë Europa. Në këtë forum marrin pjesë 27 vende anëtare të BE-së dhe 22 vende të tjera jashtë bashkimit evropian.
Kryeministri Edi Rama dhe Presidentja e Kosovës, Vjosa Osmani, janë ndër figurat shqiptare që marrin pjesë në këtë samit. Konkretisht, Rama do të përfaqësojë Shqipërinë në diskutimet që do të fokusohen në temat kryesore të ditës: situata në Ukrainë, siguria evropiane dhe strategjitë për stabilitet rajonal.
Axhenda e samitit përfshin seancë plenare në mëngjes dhe pasdite takime me tryeza të rrumbullakta për të diskutuar kërcënimet hibride, sigurinë ekonomike dhe politikën e migracionit. Gjithashtu, liderët do të kenë takime bilaterale dhe aktivitete joformale në kuadër të samitit.
Ky samit pason atë të mbajtur më 16 maj në Tiranë dhe vjen në një moment sfidash të larta gjeopolitike — pritet që rezultatet të kenë ndikim në orientimet strategjike të vendeve pjesëmarrëse dhe në bashkëpunimin e forcave politike europiane.
