Pas mesnatës së 8 shtatorit, Policia zhvilloi një aksion të gjerë antidrogë në disa qytete të qarkut të Elbasanit — përfshirë Prrenjasin, Librazhdin, Gramshin, Peqinin, Cerrikun, Belshin dhe Elbasanin. Gjatë aksionit u arrestuan 40 persona nga mosha 22-56 vjeç, kryesisht shpërndarës të lëndëve narkotike.
Forcat e policisë sekuestruan të paktën tre kallashnikovë, pistoleta dhe sasi të ndryshme drogash. Një nga të arrestuarit mbante me vete 800 gramë kokainë të pastër. Nga informacionet e brendshme mësohet se asnjëri nga të ndaluarit nuk rezulton të jetë i përfshirë në struktura të fuqishme kriminale, por operonte në nivel lokal.
Ky operacion blic synon të dëmtojë zinxhirët e shpërndarjes lokale të drogës dhe i jep një goditje serioze këtij fenomeni në zonë. Hetimet e mëtejshme vijojnë me procedurat e nevojshme për sqarimin e plotë të rastit dhe të identifikimit të rrjeteve kriminale të mundshme.
