Trump paralajmëron rikthimin te çështja Kosovë-Serbi, ja sa gjasa ka që SHBA ta nxjerrë BE-në “jashtë loje”

Presidenti i Shteteve të Bashkuara, Donald Trump, ka rihapur diskutimin mbi të ardhmen e dialogut ndërmjet Kosovës dhe Serbisë, duke dhënë një sinjal të qartë se është i gatshëm të angazhohet sërish për stabilitetin në Ballkan. Në një deklaratë të fundit në platformën Truth Social, Trump rikujtoi rolin që kishte gjatë mandatit të tij të parë në shmangien e një përshkallëzimi të rrezikshëm mes dy vendeve dhe premtoi se, nëse nevojitet, do të ndërhyjë për ta rregulluar situatën edhe një herë. Sipas tij, disa vendime të administratës Biden kanë dëmtuar perspektivat afatgjata të këtij procesi, por ai shprehet i bindur se me përkushtimin e duhur, dialogu mund të rikthehet në binarët e duhur. Megjithatë, mesazhi i Trump vjen në një moment kur zëri zyrtar i diplomacisë amerikane ngjan më i përmbajtur. Ish-ambasadori i SHBA-së në Beograd, Christopher Hill, gjatë Forumit GLOBSEC 2025 në Pragë, deklaroi se Ballkani nuk është më në qendër të prioriteteve të Shteteve të Bashkuara, të cilat janë të fokusuara në kriza më të mëdha si lufta në Ukrainë apo tensionet në Lindjen e Mesme.