Gjermania do të mbajë zgjedhjet parlamentare më 23 shkurt, ku qytetarët do të vendosin për përbërjen e re të Bundestagut dhe drejtimin e vendit për katër vitet e ardhshme. Si ekonomia më e madhe në Evropë dhe vendi më i populluar i Bashkimit Evropian, Gjermania ka një rol kyç në politikën e bllokut dhe është një nga shtyllat kryesore të NATO-s. Ajo është gjithashtu furnizuesja e dytë më e madhe e armëve për Ukrainën, pas Shteteve të Bashkuara.
Qeveria e re gjermane do të luajë një rol kyç në politikën evropiane dhe marrëdhëniet me administratën e re të presidentit Donald Trump në SHBA.
Qendrat e votimit hapen në orën 8:00 të mëngjesit dhe mbyllen në orën 18:00. Votuesit kanë gjithashtu mundësinë të votojnë me postë, por fletëvotimet duhet të mbërrijnë para mbylljes së qendrave të votimit për të qenë të vlefshme. Exit poll-et do të shpallen menjëherë pas mbylljes së votimit, ndërsa numërimi i votave nis menjëherë. Rezultatet paraprake pritet të jenë të qarta brenda pak orësh, ndërsa rezultati përfundimtar zyrtar pritet të shpallet të hënën në mëngjes.
