Kryetari i Partisë Demokratike-Demokratët Euroatlantikë, Lulzim Basha, takoi kongresmenin amerikan, French Hill, njëkohësisht edhe anëtar i Komitetit për Punë të Jashtme dhe Zëvendës Kryetar i Komitetit të Shërbimeve Financiare. Në një postim në facebook, Basha shkrun se në bisedën me Hill theksoi rëndësinë e luftës ndaj korrupsionit, duke i prezantuar iniciativat e tij për vetingun e politikanëve dhe heqjen e imunitetit të deputetëve.
Më tej ai thotë se pjesë e diskutimit ishte dhe situata e sigurisë në Ballkan, ku Basha shprehu shqetësim për përpjekjet e Rusisë për të destabilizuar rajonin, duke kërkuar mbështetje të SHBA për ruajtjen e stabilitetit në Kosovë dhe Mal të Zi.
Postimi i Bashës:
Kënaqësi të ritakohem me mikun tim, kongresmenin French Hill, anëtar i Komitetit për Punë të Jashtme, Zëvendës Kryetar i Komitetit të Shërbimeve Financiare të Dhomës së Përfaqësuesve dhe i Komitetit të Inteligjencës, i cili është gjithashtu kandidati kryesor për të drejtuar Komitetin e Financave.
Theksova se për ne, mbështetja për drejtësinë dhe lufta e pakompromis kundër korrupsionit janë prioritete kryesore. Korrupsioni po gërryen ekonominë dhe po shtyn drejt emigracionit të rinjtë, intelektualët dhe punonjësit e specializuar.
Lidhja e politikës me krimin, e denoncuar prej meje për vite me radhë dhe tashmë e faktuar edhe në hetimet e SPAK-ut, është një problem i jashtëzakonshëm për vendin. E njoha kongresmenin Hill me nismat e mia për vetingun e politikanëve, si dhe me nismën për heqjen e imunitetit të deputetëve, çka do t’i jepte mundësi Prokurorisë të hetonte pa u penguar nga mbrojtja që kanë politikanët në Parlament.
Fatkeqësisht, mazhoranca refuzon t’i fusë edhe për diskutim këto nisma, duke dëshmuar se është gati të bëjë gjithçka për të mbrojtur deputetët dhe qeveritarët e lidhur me krimin dhe të korruptuar.
Kongresmeni Hill dëgjoi me vëmendje programin tonë për të qeverisur vendin, që përfshin uljen e taksave, mbështetjen e të rinjve, forcimin e familjes përmes mbështetjes ekonomike dhe financiare, programin për arsimin dhe shëndetësinë, si dhe planin për të luftuar korrupsionin dhe rikthimin e investitorëve të huaj, ku natyrisht kemi një interes të veçantë për investitorët amerikanë.
