Gjatë seancës së djeshme të Kuvendit të Shqipërisë Edi Rama mori pozën e Babagjyshit të Vitit të Ri që fsheh në thes “dhuratën” e bonusit të fundvitit për pensionistët shqiptarë. I vënë me shpatulla pas murit prej protestave të pensionistëve dhe Lëvizjes BASHKË, Edi Rama u shtrëngua ta rrisë bonusin, duke hamendësuar se me një gjest të tillë do të hutojë pensionistët dhe do t’i bëjë të harrojnë varfërinë e përditshme.
Nëse e zbërthejmë bonusin, ai përbën një rritje ditore pensioni prej 26 deri në 40 lekë në ditë, mesatarisht sa një çerek buke. Ky bonus as që i afrohet pragut të minimumit jetik, i cili është kushti i mbijetesës së pensionistëve. Nëse bëjmë llogaritë, vetëm në një prej dymbëdhjetë muajve të vitit (dhjetor) pensionistët shqiptarë do të përfitojnë pension që arrin standardet e minimumit jetik. Në njëmbëdhjetë muajt e tjerë do të vazhdojnë t’i shpëtojnë urisë dhe të blejnë ilaçe duke u mbështetur nga fëmijët e tyre.
Buxheti i vitit 2025 nuk parashikon as indeksim të mirëfilltë të pensioneve, por vetëm një rritje prej 1%. Ky indeksim i munguar do të përpiqet të mbulohet me hilenë e dytë të Ramës, përgatitjen e një bonusi të dytë përpara zgjedhjeve parlamentare të 2025. Pra në vend të rritjes së qëndrueshme dhe të përmuajshme të pensioneve, qeveria e Edi Ramës do të përdorë manovra propagandistike të dhurimit të disa mijëra lekëve përpara zgjedhjeve me shpresën marroke se kësisoj do t’i bëjë pensionistët të harrojnë urinë, moskujdesin shëndetësor dhe poshtërimin e përditshëm nga një shtet i korruptuar deri në palcë.
Problemet e mëdha strukturore që përftojnë në Shqipëri nivelin më të ulët të pensioneve në Evropë nuk mund të preken nga një qeveri, pushteti dhe pasurimi i të cilës bazohen te këto probleme. Së pari, korrupsioni. Në Shqipëri vidhet jashtëzakonisht shumë. Të paktën 1 miliard euro në vit avullojnë prej korrupsionit, detyrimeve fiskale të papaguara të oligarkëve dhe shpërdorimeve. Për të mos përmendur pastaj se sa para humb buxheti i shtetit nga favoret fiskale ndaj oligarkëve (ligji i investitorëve strategjikë, privilegjet e pronarëve të hoteleve me 4-5 yje, përgjysmimi i tatimit të dividendit për korporatat etj.). Një pjesë e këtyre fondeve mund të shpërndahej për pensionistët duke hedhur një hap shumë të rëndësishëm drejt vendosjes së standardit të minimumit jetik.
