Organet e reja drejtësisë në Shqipëri, të mbështetura fuqishëm nga Shtetet e Bashkuara të Amerikës dhe Bashkimit Evropian, kanë formuar një front të fortë kundër përpjekjeve të kryeministrit Edi Ramës për të minuar funksionimin e Prokurorisë së Posaçme (SPAK”, ku në finale synohet asgjësimi i saj. Komisioni Antikorrupsion i ngritur nga Partia Socialiste edhe i drejtuar nga Fatmir Xhaf, i cili ndryshe quhet si komisioni famkeq dhe ka ngjallur shumë polemika, është refuzuar nga të gjitha institucionet kryesore të drejtësisë, përfshirë Prokurorinë e Posaçme, Prokurorinë e Përgjithshme, Gjykatën e Lartë, Gjykatën Kushtetuese dhe Inspektoratin e Lartë të Drejtësisë. Ky unison mes institucioneve tregon një angazhim të qartë për të mbrojtur pavarësinë e sistemit të drejtësisë dhe për të siguruar që drejtësia të funksionojë pa ndonjë ndikim politik. Ndërsa tensionet rriten, ky bashkëpunim ndërkombëtar dhe vendës synon të forcojë mekanizmat ligjorë dhe të sigurojë ndëshkimin e abuzimeve të pushtetit.
Detajet
Konkretisht institucionet e pavarura të drejtësisë refuzojnë të jenë pjesë e Komisionit Antikorrupsion të ngritur nga mazhoranca, që njihet dhe si komisioni “Xhafaj”. Pas refuzimit të dërguar dy ditë më parë nga Gjykata Kushtetuese, edhe Prokuroria e Posaçme (SPAK) dhe Inspektoriati i Lartë i Drejtësisë (ILD) deklaruan se nuk do të jenë pjesë e Komisionit të Posaçëm Antikorrupsion. Pas tyre ishte edhe Gjykata e Lartë, që u bë institucioni i katërt zyrtar që refuzon të jetë pjesë e Komisionit Antikorrupsion. Në letrën drejtuar Fatmir Xhafajt, firmosur nga kryetari i Gjykatës së Lartë, Sokol Sadushi, argumentohet se “nuk vlerësohet si zgjidhje e përshtatshme me misionin e gjyqtarit, nuk vlerësohet si zgjidhje e përshtatshme në përmbushje të misionit të Komisionit të Posaçëm”, por se nga ana tjetër “janë gati nëpërmjet 3 këshilltarëve të institucionit të marrin pjesë në rolin e vëzhguesit, e të japin mendime dhe sugjerime pas një analize”. Po ashtu burimet bëjnë me dije se edhe ILD ka refuzuar pjesëmarrjen duke i kthyer një përgjigje negative kuvendit. Edhe Prokuroria e Përgjithshme pritet të ketë të njëjtin qëndrim, edhe pse ende nuk është konfirmuar zyrtarisht nga ky institucion.
Reagimi i SPAK
“Në përgjigje të interesimit tuaj, ju bëjmë me dije se kërkesa e Komisionit të Posaçëm Parlamentar “Për Thellimin e Reformave për Mirëqeverisjen, Sundimin e Ligjit, dhe Antikorrupsionin për Shqipërinë 2030 në Bashkimin Evropian” (Komisioni), u analizua me shumë kujdes nga ana jonë duke u trajtuar në Mbledhjen e Prokurorëve të Posaçëm të datës 03.09.2024. Gjatë kësaj mbledhjeje, Prokurorët e Posaçëm diskutuan rëndësinë e bashkëpunimit me Kuvendin për përmirësimin e sundimit të ligjit dhe luftën kundër korrupsionit dhe krimit të organizuar, gjithmonë duke respektuar parimin e ndarjes dhe balancimit të pushteteve. Në mënyrë unanime të gjithë Prokurorët e Posaçëm nuk e konsideruan të nevojshme pjesëmarrjen me ekspert në këtë Komision, pasi vlerësuan se tashmë institucioni ynë i ka përmbushur detyrimet ligjore për bërjen publike të problematikave të hasura gjatë ushtrimit të funksioneve të tij duke përfshirë këtu dhe nevojat për ndryshime ligjore përkatëse. Ky detyrim ligjor është realizuar përmes publikimit të Raporteve Vjetore të SPAK në faqen zyrtare, si dhe raportimeve periodike përballë KLP-së dhe Kuvendit. Nga ana tjetër, Prokuroria e Posaçme, cilësoi se është e gatshme për të ofruar kontributin e saj përmes dhënies së mendimeve ligjore sa herë që do të konsiderohet e nevojshme nga ky Komision”, deklaroi dje SPAK për një media.
