Një nga rrjetet sociale më të populluara në botë, “X”, është offline në Brazil. Ky i fundit është vendi i pestë për popullatën më të madhe digjitale dhe vendimi u mor pasi Elon Musk refuzoi që t’u bindej ligjeve të vendit
Miliona përdorues të platformës X e gjetën veten pa akses në këtë platformë mëngjesin e së shtunës, pasi ofruesit e internetit dhe kompanitë e telefonisë celulare u detyruan që ta zbatonin ndalimin ndaj “X-it”.
Një numër i madh brazilianësh kërkuan strehim në rrjetin rival, Bluesky, i cili raportoi se kishte fituar 500,000 përdorues në dy ditët e fundit.
Anëtarët e rinj të Bluesky përfshinin Felipe Neto, një nga influencuesit kryesorë të mediave sociale në Brazil me më shumë se 17 milionë ndjekës në X.
“Mos harroni, kur shkoni në një vend tjetër, jeni të detyruar të ndiqni legjislacionin e tij, edhe nëse nuk jeni dakord me të”, shkroi Neto.
