Dosja ndaj mjekëve të Onkologjikut i ka kaluar Prokurorisë së Posaçme. Do të jenë prokurorët e SPAK të cilët do të vlerësojnë hetimet e kryera nga Prokuroria e Tiranës dhe do kryejnë hetime të tjera ndaj 7 të akuzuarave. Kjo e fundit 5 ditë më parë shpalli moskompetencë, pasi dyshohet për korrupsion dhe grup të strukturuar kriminal. Më 26 Qershor, Prokuroria e Tiranës zbuloi skemën e mashtrimit dhe zhvatjes së pacientëve të sëmurë me tumor në spitalin e Onkologjikut. Mjeku Edmond Gashi dyshohet se në bashkëpunim me kolegët e tij orientonin pacientët e diagnostikuar me kancer në një klinikë private, e cila rezulton në emër të babait të tij. Për çdo pacient që orientohej për trajtim tek spitali privat, mjekët e Onkologjikut përfitonin shuma të konsiderueshme parash.
Përveç Edmond Gashit, Emiljano Leka, koordinator pranë Spitalit Onkologjik ne QSUNT, Alketa Ymeri(Pere), mjeke, Brikena Qirjazi, Zv/Drejtoreshë në QSUNT e ngarkuar me detyra për shërbimin onkologjik, Halil Gashi, Florian Marku, administrator i Flori Farma dhe Drilona Kishta janë personat e vënë nën hetim, të cilët në bashkëpunim me njëri-tjetrin bënin “pazar” me jetën e pacientëve. Nga hetimet u zbulua se në Onkologjik u instalua një aparaturë Kobalto-Terapie për trajtimin e të sëmurëve të diagnostikuar me sëmundje tumorale dhe sidomos të sëmundjeve të kancerit të lëkurës. Që të përdoret Cobalt Therapy duhet të krijohet një bunker antiradioaktiv ose antiatomik në kushtet e miratuara dhe të prezantuara nga Agjencia Atomike e Vienës.
Hetimet zbuluan se ky bunker jo vetëm nuk u krijua, por aparatura u vendos jashtë kushteve teknike. Edhe KLSH ka bërë një kallëzim për rastin, në SPAK. “Jemi të detyruar që konkluzionet tona për Onokologjikun, ti drejtojmë në institucionin që është institucioni kompetent për të ndjekur në mënyrën më të plotë të mundshme të gjithë tablo të skeletit të ligjit penal, pra Prokuroria Speciale”, është shprehur më parë kreu i KLSH.
SPAK nuk do të ndalet me kaq, pasi në këtë mes rrezikojnë edhe pushtetarë të lartë. Drejtuesi i Lëvizjes “Shqipëria Bëhet”, Adriatik Lapaj kallëzoi pak javë më parë drejtuesit e Ministrisë së Shëndetësisë dhe QSUT në 10 vitet e fundit, pasi sipas tij, kanë qenë në dijeni të mungesës së ilaçeve dhe pajisve mjekësore. Pak javë më parë Lapaj u shpreh se ka punuar për rreth 6 muaj për këtë kallëzim, i cili sipas tij korrespondoi edhe me skandalin e fundit tek Onkologjiku. Ai bëri me dije se ka kallëzuar tre ministrat e fundit të Shëndetësisë dhe dy ish-drejtorët e QSUT.
Lapaj po ashtu i bëri thirrje opinionit publik që të mos kenë frikë por të denoncojnë me forcë mungesën e ilaçeve apo pajisjeve mjekësore. “Në gjykojmë dhe mendojnë se mungesa e pajisjeve në spitale janë si pasojë e dijenisë së gjithë sistemit drejtues. Ministrat kanë qenë në dijeni, drejtorët e reparteve kanë qenë në dijeni. Në lidhje me ilaçet, mungojnë faktorët me hemofilinë. Është plotësuar më pak se 20% e nevojave. Për ilaçet e tjera, për leucemitë dhe kancerat, ose janë marrë në sasi shumë më të vogël se sa nevojitet ose edhe kur janë tenderuar rezultojnë të mos jenë administruar në sasinë e paguar. Këto për në përbëjnë vepra penale.
