SHBA blen 81 avionë sovjetikë të papërdorshëm për 19,300 dollarë secili, ja arsyeja befasuese

SHBA ka blerë 81 avionë luftarakë të epokës sovjetike nga Kazakistani, sipas “Kyiv Post”. Kazakistani, i cili po modernizon flotën e tij ajrore, ka nxjerrë në ankand 117 avionë luftarakë dhe bombardues të epokës sovjetike, duke përfshirë përgjues MiG-31, gjuajtës-bombardues MiG-27, avionë luftarakë MiG-29 dhe bombardues Su-24 të viteve 1970 dhe 1980. Siç raportohet nga “Business Insider”, vlera e deklaruar e shitjes ishte një miliard tenge kazake, ose 2.26 milionë dollarë, që është mesatarisht 19,300 dollarë për avion. Mediat cituan raporte nga kanali ukrainas Telegram Insider UA dhe faqja ruse e lajmeve Reporter, të cilat thanë se SHBA kishte blerë 81 avionë luftarakë të vjetër, të papërdorshëm. “Kyiv Post” raportoi se motivi i blerjes nga SHBA është ende i pazbuluar, por tha se avionët mund të përdoren në Ukrainë, e cila ka avionë të ngjashëm. Faqja ruse Reporter thekson se shitja është bërë përmes kompanive offshore. Por importuesi dhe eksportuesi shtetëror i armëve Kazakistani Kazspetsexport, ndërkohë ka mohuar shitjen e avionëve ushtarakë Ukrainës duke thënë në një deklaratë se kompanitë e huaja nuk lejohen të bëjnë ofertë. Duke pasur parasysh mbështetjen e vazhdueshme të Ukrainës në armët e epokës sovjetike, aeroplanët mund të shërbejnë ose si burim pjesësh rezervë ose mund të vendosen në mënyrë strategjike si mashtrime, ose objektiva të rreme në aeroporte për sulmet ruse, raportoi “Kyiv Post”. Mikoyan MiG-31 është një interceptor supersonik i krijuar për të mbrojtur hapësirën ajrore sovjetike, sipas Airforce Technology. Ai luajti një rol kyç gjatë Luftës së Ftohtë. MiG-27 është një avion sulmi dhe ka marrë pjesë edhe në Luftën Sovjetike-Afgane.