Në takimin kundër pasurive me burim korrupsionin e trafiqet, drejtuesi i SPAK kishte në krahë Fatmir Xhafën, vëllain e trafikantit që nuk po i sekuestron pasuritë…
Në takimin e organizuar nga “Qendra për Studimin e Demokracisë dhe Qeverisë”, është vënë re një detaj i veçantë në veshjen e drejtuesit të SPAK, Altin Dumani, i cili ishte i ftuari kryesor për të folur mbi platformën dhe arritjet e SPAK.
Në takimin ku foli për luftën kundër korrupsionit shtetëror, dhe për dhënien fund të paprekshmërisë në nivelet e larta të politikës e shtetit, Altin Dumani shkoi me xhaketë me filigran ari.
Deri para 1 viti kur ishte prokuror i thjeshtë, Altin Dumani nuk ka ekspozuar veshje të shtrenjta; ndërsa në takimin e luftës kundër korrupsionit të shtetarëve, ai shkoi me xhaketë të qëndisur me filigran ari.
Ky ndryshim, u ra në sy atyre që zbulojnë edhe “gjilpërën në kashtë”; konkretisht, ekspertëve të FBI, të cilët me të drejtën e dhënë nga Kushtetuta e Shqipërisë, janë pjesë e SPAK-ut dhe BKH-së, me mision ndihme, kualifikimi, orientimi e mbikëqyrje hetimesh.
Sipas burimeve që administron “Pamfleti”, drejtuesi i ekipit të FBI në SPAK, i tërhoqi vëmendjen Altin Dumanit, pse shkoi me një veshje të tillë në një takim zyrtar e publik; për më tepër, që u zhvillua në momentin, kur kanë nisur goditjet me heqje imuniteti e urdhër-arreste ndaj hajdutëve krerë të lartë të politikës e shtetit.
Sipas Dumanit, xhaketa me filigran ari mund të jetë normale në Shqipëri, ku kryeministra, ministra, deputetë, krye bashkiakë e drejtorë, ndërrojnë nga 3 herë në ditë veshjet, makinat e bizhuteritë.
Por sipas ekspertëve të FBI, veshjet e shtrenjta të drejtuesit të SPAK, moralisht kompromentojnë dhe zhvlerësojnë besimin ndaj tij, ndaj institucionit që drejton e sidomos ndaj reformës në Drejtësi.
Çështja e dytë, për të cilën partnerët amerikanë i “tërhoqën veshin” Altin Dumanit, është qëndrimi ndaj medias në atë takim, ku ai me kapadaillëk e njëlloj si Adriatik Llalla dikur, tha se nuk i përfill fare denoncimet dhe akuzat që i bëhen atij e vartësve.
Kreu i SPAK nuk ka pse t’i shpërfillë denoncimet e medias; as të nxjerrë urdhra që media të hesht për pazaret e tij e të prokurorëve të SPAK, madje as të arrestojë e mbajë peng gazetarët.
Sepse mediat nuk kanë shpifur siç thotë Altin Dumani, por kanë denoncuar e kanë kërkuar prej tij, sqarime se përse Ilir Beqja nuk u fut në dosjen e pajisjeve kirurgjikale; përse nuk po mbyllen hetimet ndaj tij për PPP-të e Check-up, Laboratorëve, Hemodializës; dhe përse pas presionit të medias, Ilir Beqja u procedua penalisht me “Detyrim paraqitje”, dhe nuk arrestohet si të tjerët.
Media ka denoncuar, faktin që në dosjen e aferës së landfilleve, nuk janë futur Edi Rama, Engjëll Agaçi, Blendi Klosi, Belinda Balluku, Anila Denaj, Erjon Veliaj, Armando Subashi i Fierit, Qazim Sejdini i Elbasanit dhe Geraldina Prodani, ish-Sekretare e Ministrisë së Financave që ka firmosur të gjithë dokumentet.
Po kështu e konkretisht, “Pamfleti” ka denoncuar dhe i ka kërkuar Altin Dumanit, të fillojë hetimin për ”Rrugën e Arbrit”; e cila jo vetëm ka kaluar me 2 vite afatin e përfundimit, por kryeministri Edi Rama, ministreshat Belinda Balluku, Anila Denaj, Delina Ibrahimi e oligarku Rrok Gjoka kanë shtuar 167 milionë Euro me preventivë fals.
Madje, në takimin anti-mafie, Altin Dumani kishte në krahë Fatmir Xhafën, vëllain e trafikantit që nuk po i sekuestron pasuritë…
Urojmë, që pas xhaketës së tij me filigran ari, të mos qëndrojë kompromentimi si gjithë të tjerët, ndër ta dhe paraardhësi Arben Kraja me vilë në Lalz.
