Roland Bejko: Në ‘Foltore’ janë bashkuar ata që urreheshin në PD, do shqyejnë njëri-tjetrin, nëse Berisha tërhiqet vendi shkon për 6 muaj zgjedhje

Nënkryetari i Partisë Demokratike, Roland Bejko në një intervistë për mediat dje zbuloi se te Rithemelimi janë bashkuar të gjithë ata që dikur urreheshin në PD. “Në Foltore janë bashkuar të gjitha ata që urrenin njëri tjetrin në PD. Shumë shpejt do t’ia shohësh tymin. Janë karaktere dhe interesa të ndryshme nuk mund të bashkëjetojnë. Më parë i ka bashkuar autoriteti i Berishës, por pa të do të shqyejnë njëri tjetrin. Janë futur në moçalin e Foltores me shpresën se kush do mbijetojë pasi Berisha të largohet për arsye të drejtësisë apo natyrore. Perëndia e tyre është Saliu, nuk është Gazi as Flamur as Albana”, deklaroi ai. Lëvizje pa integritet e quajti kalimin e Gazment Bardhit me deputetët që e mbështesin, te “Foltorja” e Sali Berishës. “S’ka konsistencë, s’ka qëndrueshmëri. Nuk flitet më për integritet këtu. Mund ta kenë pasur por tashmë nuk e kanë më sepse nuk ka ndryshuar ajo për të cilën u vendosën përballë Berishës. Berisha theu statutin e partisë për të marrë partinë. Kur Basha i cenoi interesin Berishës kur mori gjysmë mendimi që e pezullonte përkohësisht nga grupi, Berisha u tërbua. Arsyeja e dytë ishte Berishizmi. Të gjithë e kuptuan se nga Everizmi kaluan te Ramizizmi dhe më pas te Berishizmi. Në momentin që dolën dhe kundër Berishizmit. Unë kam mbajtur flamurin e anti-berishizmit. U bë një Kuvend i 18 dhjetorit i shkëlqyer”, u shpreh ai. Më tej Bejko nënvizoi se janë të paktë ata që janë larguar nga Berisha dhe nuk i janë bashkuar përsëri. “Në 33 vite të gjithë ata që i janë larguar Berishës, kur i ka sulmuar Berisha edhe i ka rrahur ata janë larguar prej tij, por kur kanë dështuar si qen të rrahur kanë ardhur dhe i janë bashkuar Berishës. Që nga 90 e deri më sot. Janë shumë të paktë ata që i janë larguar Berishës dhe nuk i janë bashkuar përsëri”, tha ai. Ndërkohë nëse Berisha tërhiqet, nënkryetari i PD tha se për 6 muaj ka zgjedhje të parakohshme prej të cilave PD sipas tij del fituese. “Sikur Berisha të tërhiqet opozita futet në një dimension të ri dhe i fiton zgjedhjet, sado patronazhistë të angazhojë Rama. Nëse Berisha tërhiqet për 6 muaj zgjedhje të parakohshme. Berisha nuk ka dëmtuar vetëm PD me aktin që bëri por demokracinë shqiptare sepse ka lënë vendin pa opozitë. Ne u tregojnë shqiptarëve se tre ose katër oligarkë Rama dhe Berisha i kanë të përbashkët. Vetë Gaz Bardhi ka akuzuar Flamur Nokën”, nënvizoi Bejko.