Në një analizë të publikuar nga gazetari Gjergj Erebara, theksohet se debati politik dhe polemikat në Kuvend po largojnë vëmendjen nga një çështje që, sipas tij, është thelbësore për funksionimin e shtetit ligjor në Shqipëri.
Sipas analizës, shumica socialiste po zvarrit përgjigjen ndaj kërkesës së Prokurorisë së Posaçme për heqjen e imunitetit të deputetes Belinda Balluku, një çështje që konsiderohet vendimtare për respektimin e parimit të barazisë përpara ligjit.
Autori sjell në vëmendje edhe përplasjet politike të viteve të kaluara, duke përmendur një episod në vitin 2008 në Kuvend, kur debati për tragjedinë e Gërdecit u shoqërua me gjuhë fyese dhe tensione politike.
Në analizë theksohet se sot situata është e përmbysur, ndërsa sipas autorit, përgjegjësia për të vepruar i takon shumicës parlamentare që duhet t’i përgjigjet kërkesës së drejtësisë.
Erebara argumenton se refuzimi për të marrë një vendim mbi kërkesën e SPAK për heqjen e imunitetit të Ballukut rrezikon të dëmtojë shtetin e së drejtës dhe procesin e integrimit evropian të Shqipërisë.
Sipas tij, debati mbi gjuhën politike apo incidentet në parlament nuk duhet të largojë vëmendjen nga çështja kryesore: nevojën që Kuvendi të marrë një vendim për kërkesën e drejtësisë.
